Sawsawan

     Ang gulo nitong alaga kong Labrador. Kapag nandito ako sa garahe upang magpinta, palaging nakahiga sa tabi ko. Pag tumayo ako para kumain, o kaya'y pumunta sa CR, pagbalik ko, andun na siya sa puwesto ko. Madalas, madidinig ng kapitbahay na me kausap ako: "Sige, ikaw na kaya ang magpinta?!" Siguro, kung naniniwala lang ako sa reincarnation, baka naisip kong isa dating master artist itong alaga ko. Siya nga pala si Sassy, babae, 4 na taon na, at dalaga pa din. Itim na Labrador, pure breed, at tumitimbang ng 38 kilos. Oo, di na mukhang aso: mukhang baboy na itim.



     Naatasan akong magpinta ng isang imahe ng Birhen ng La Salette nuong Hunyo, at natapos ko ito nuong Agosto. Dinala ang print nito sa Pransya upang ilagay sa Museo ng La Salette, at ang orihinal naman ay dinala sa kanilang Shrine sa Silang, Cavite. Acrylic paint ang ginamit ko, at nakapinta ito sa watercolor paper na Arches ang tatak, galing pa ng Pransya. Sari-saring brush ang ginamit ko, at realism ang style na ginawa ko. Maraming kulay ang tinimpla ko, maraming oras ang ginugol (hindi google ha). Sa tutoo lang, umabot ng limang understudy ang nagawa ko bago ang huli na dinala sa Pransya. Sa paggawa ko ng artwork na ito, malaking bahagi ang partisipasyon ng sawsawan. Sawsawan ng ano? Ah, ito po ay ang sawsawan ng brush kapag gusto mong hugasan.....

     Kahit anong lalagyan ay pwedeng sawsawan. Plastik, babasagin. Basta medyo malaki, mataas. Alam niyo ba yun sisidlan ng Stick-O? O kaya yun bote ng Lady's Choice na Sandwich Spread. Pwede na rin yun container na galon ng ice cream. Nilalagyan ito ng tubig at dun binabanlawan ang mga brush kapag nagpipinta. Kailangan, madami kang sawsawan: meron pang over-all na panlinis ng brush, meron 2nd, at meron kang 3rd na sawsawan ng malinis na tubig. Minsan, kailangan mong mag-wash effect, at dito ka sa 3rd container kukuha ng tubig sa pmamagitan ng brush. Kailangan, malinis itong sawsawan na ito. Usually, ang gamit kong mga sawsawan ay malalaking tasa o mug. Para madaling buhatin at palitan ng tubig at madaling hugasan kapag kontaminado na ng madaming kulay.

Tayo man ay kailangan may sawsawan sa buhay natin. Madalas, pagod tayo sa trabaho. Burnt out na. Kailangan mag-relax. Mga mister ng tahanan-ang iba'y nag-go-golf, at ang ang iba'y nag-go-gulp.Ang mga misis, pagod sa bahay. Dapat naman kayong mag-spa. Humingi ng pang-spa sa asawa, siyempre! Sa mga mag-aaral, pagod sa mga gawain pang-eskwela. Paminsan-minsan naman, mag-dota o kaya, mag bungee jumping (weeeeeeeeee). Pero take note students: paminsan-minsan. Kailangan natin lahat ang makapagpahinga. Malinisan ang isip, diwa, pati kaluluwa. Kung puro dumi, gulo ang laman ng ating isipan, at napapligiran tayo ng mga pagsubok, dapat tayong humanap ng sawsawan. Isa sa mga ginagawa ko ay ang pumunta sa Adoration Chapel. Duon ako sumasawsaw sa Presensiya Niya. Sa mga hindi katolikong nagbabasa nito, maaring pumunta sa inyong bahay-sambahan, mosque, kapilya, at dun kumuha ng pahinga. Duon ka sumawsaw. Kailangan natin ma-revive, para sa muling pagkumpas ng kamay, isang malinis na brush nanaman tayo, puno ng sigla, at puno ng buhay. Ang brush na madalang masawsaw  ay tumitigas ang bristles. Ganun din ang tao: nagiging manhid sa paligid niya, nagiging matigas, at nawawalan ng saysay. Ang mga brush na tumitigas ang brotsa, ginagawang pamahid ng solignum sa anay, o dili kaya, ginagawa na lang panlinis ng dumi ng electric fan.

Sawsawan. Mga lugar na kung saan tayo ma-re-refresh. Meron isang sawsawan, na palaging andyan lang sa malapit: Ang iyong sariling kuwarto. Sa panahong ako'y pagod sa mga sari-saring gulo ng buhay, pumapasok ako sa aking kwarto, at duon, nakikipagusap ke Lord. Duon ako nagsusumbong, nagrereklamo, duon ako umiiyak. Duon ako nagkukuwento sa Kanya. At duon din ako nakikinig sa mga pangaral Niya, sa mga utos, tips, at duon din Niya ako binibigyan ng pahinga.

     Siyanga pala, ako'y nagkakape habang nagpipinta. Madalas, abala ako sa aking pagpipinta, di ko namamalayan na iniinom na ni Sassy ang kape. ko. Madalas din nasasawsaw ko ang brush sa kape ko. At madalas din mainom ko ang sawsawan ng brush. Okay naman ang lasa. Kulay halo-halo at lasang kape. Good day po.